ഭയം ചില മനസ്സുകളിൽ

ഭയം ചില മനസ്സുകളിൽ 

പണ്ടു .....

ദശരഥനെന്തിനു വിങ്ങി വിയര്ത്തു 

മുനി ദമ്പതിമാർ ചാരെ നിന്നു ?

അന്ധൻ മുനി തൻ മുന്നിൽ  വച്ചത് 

സ്വന്തം മകനുടെ  ജഡമെന്നറിഞ്ഞു 

നൊന്തു ശപിക്കെ രാജാവിൻ മന 

മെന്തെ ഞെട്ടി? പേടി കൊണ്ടല്ലേ 

പണ്ടൊരു നാളതിബലവാനൊരുവൻ 

മണ്ടിചെന്നാനിരുപതു കയ്യാൽ 

കയറതെടുത്തു കെട്ടിവരിഞ്ഞു 

 വെള്ളിക്കുന്നു വലിച്ചു കുലുക്കി 

ശശിധരനുള്ളിൽ ചിരിവന്നെന്നാൽ 

 പർവത നന്ദിനി പേടിച്ചില്ലെ.

ഓടിച്ചെന്നവൾ  കാന്തൻ  ചാരെ 

അന്നവർ  കലഹവുമങ്ങനെ തീർന്നു   

മുക്കുവനോതും വാക്കുകൾ  കേൾക്കേ   

ശന്തനു തൻ മുഖമെന്തേ  മങ്ങീ 

ഗംഗാപുത്രനെ ഓർത്തോ  രാജൻ 

സ്വന്തം പ്രജകൾ മന്ത്രീ സത്തമർ 

ഇവരുടെ മുന്നിൽ  ചെറുതാകും തൻ

 സൽ പേരോർത്ത്  ഭയന്നതു കൊണ്ടോ?

ഗുരുവിനു മുന്നിൽ  വിപ്രൻ മട്ടിൽ 

വിദ്യ പഠിക്കാനെത്തി രാധേയൻ 

പൊളി പറഞ്ഞെന്നത് കണ്ടുപിടിച്ചാ 

ഗുരു ശപിച്ചപ്പോൾ ഭയമായോ കർണ്ണാ 

അങ്കത്തട്ടിൽ വിദ്യകളെല്ലാം 

കാറ്റിൽ പറക്കും പഞ്ഞി കണക്കെ 

ഓർമയിൽ നിന്നും പാഞ്ഞകന്നപ്പോൾ 

ഓർതിതെന്റെ വിധിയാണിതെന്നോ 

ഗാന്ധാരി ചെന്നങ്ങു യുദ്ധക്കളത്തിൽ 

കണ്ടതോ മക്കൾ തൻ പ്രേതങ്ങൾ മാത്രം 

അമ്മമനസ്സ് വെന്തു പോയപ്പോൾ 

പൊന്തിയ ശാപ വചസ്സുകൾ കേൾക്കേ 

കൃഷ്നക്ക് തോഴനാം കൃഷ്ണൻ മനസ്സിൽ 

തോന്നിയതേതു വികാരം ഭയമോ 

ഇന്നു. ഒരു അമ്മ മനസ്സ് . 

എൻകുഞ്ഞിതുവരെ  വീടെത്തിയില്ല 

സന്ധ്യയാകുന്നതു കണ്ടീലയെന്നോ 

വിദ്യാലയം വിട്ടാൽ പോകണം നേരെ 

ട്യൂഷനെടുക്കുന്ന  ടീച്ചർ തൻ ചാരേ 

എന്നാലു മെത്തീടാൻ നേരമായല്ലോ 

എന്തെൻ മകളിത്ര വൈകുന്നു ദേവീ 

എന്തൊക്കെയാണിന്നു  പത്രം തുറന്നാൽ 

എന്തെന്തു വാർത്തകൾ ശിവ ശിവ കേൾപ്പു 

എന്റെ മോളാപത്ത് കൂടാതെ വന്നാൽ 

എന്നുണ്ണി കൃഷ്നാ  വെണ്ണ തരാമേ 

മകൾ ...

. 

ട്യൂഷൻ കഴിഞ്ഞിട്ടും കൂട്ടുകാർ  പോയിട്ടും 

ടീച്ചർ തൻ ചാരെ നിൽക്കുവതിന്നായ് 

ഓരോരോ  കാരണമുണ്ടാക്കീ ഞാനും 

കാത്തു നില്പ്പാണിന്നു സന്ധ്യ കഴിയാൻ 

അമ്മയില്ലാത്തപ്പോൾ വീട്ടിലെത്തീടാൻ

 പേടിയാണെന്നു ഞാൻ ആരോടു ചൊല്ലും 

ജോലി കഴിഞ്ഞെന്റെ അമ്മവരും വരെ 

ഈ വീട്ടില് തങ്ങുമെൻ രക്ഷയിതൊന്നെ 

ഇന്നലെ അമ്മയില്ലാ നേരമെന്റെ 

മുറിയിലെന്നച്ചൻ  അച്ഛനല്ലാതായ് 

മുറിതുറന്നോടി ഞാൻ റോഡിലെത്തുമ്പോൾ  

അയലത്തെ വീട്ടിലെ ചേച്ചി ചോദിച്ചു 

എന്തെന്റെ കുഞ്ഞേ നീ വീട് വിട്ടോടുന്നു 

എന്തെങ്കിലും കണ്ടു പേടിച്ചു പോയോ 

എന്തു  ഞാൻ ചൊല്ലേണമന്യരോടെല്ലാം 

എന്നച്ചനെയാണ് ഭയമെനിക്കെന്നോ?

എന്നും കണ്ണീരു മാത്രമാണമ്മ യ്ക്ക് 

എങ്ങനെ ഈകഥ ചൊല്ലീടും ഞാൻ?

കോഴിക്കുഞ്ഞിന് പേടി മാവിൻ കൊമ്പിലിരിക്കും കാക്കപ്പെണ്ണിനെ 

കാക്കയ്ക്കാരെ പേടി കൂട്ടിലെ മുട്ടയുടച്ച  പാമ്പിനെയത്രേ 

പാമ്പിനു പേടിഏറെ മുകളിൽ  വട്ടം ചുറ്റും പരുന്തിനെയെന്നാൽ 

പരുന്തിനാരെ പേടി അതിലും മുകളിലിരിക്കും ദൈവത്തെയോ?